ឯកឧត្តមទេសរដ្ឋមន្ត្រី ស៊ុន ចាន់ថុល ជួបពិភាក្សាការងារជាមួយក្រុមហ៊ុន Microsoft
28-October-2015 | ដោយ មួយឡា
ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយ គណៈប្រតិភូក្រុមហ៊ុន Microsoft ថ្ងៃទី២៧ ខែតុលា ឆ្នាំ២០១៥ នៅទីស្តីការក្រសួងពាណិជ្ជកម្ម ។
សមាសភាពក្រុមគណៈប្រតិភូ អញ្ជើញចូលរួមក្នុងជំនួបនោះ រួមមាន៖ លោកស្រី Ms. Michelle Simmons នាយកគ្រប់គ្រងទូទៅ ផ្នែកទីផ្សារថ្មី លោកស្រី Astrid S. Tuminez នាយកទទួលបន្ទុកកិច្ចការច្បាប់ និងកិច្ចការក្រុមហ៊ុនប្រចាំតំបន់ លោកស្រី Rebecca Ho អ្នកយុទ្ធសាស្ត្រកម្មវិធីកម្មសិទ្ធិបញ្ញា នៃអង្គភាពទទួលបន្ទុកបទល្មើស តាមប្រព័ន្ធឌីជីថល និងកិច្ចការច្បាប់ក្រុមហ៊ុន។
លោកស្រី Simmons បានជម្រាបជូនឯកឧត្តមទេសរដ្ឋមន្ត្រី អំពីសកម្មភាពថ្មីៗជុំវិញបញ្ហាក្រុមហ៊ុន Microsoft។ លោកស្រីបានចែករំលែក នូវចក្ខុវិស័យរបស់ក្រុមហ៊ុន និងអនាគតនៃសមត្ថភាព បច្ចេកវិទ្យា Cloud។
ជាមួយគ្នានេះផងដែរលោកស្រី និងឯកឧត្តមទេសរដ្ឋមន្ត្រី បានសម្តែងនូវចំណាប់អារម្មណ៍របស់ខ្លួន ចំពោះការរួមចំណែក ដល់ការដោះស្រាយបញ្ហាកង្វល់ សុវត្ថិភាពប្រព័ន្ធបច្ចេកវិទ្យាទូរគមនាគមន៍ (Cyber Security) សម្រាប់រាជរដ្ឋាភិបាលកម្ពុជា និងបានស្វែងរកកិច្ចសហប្រតិបត្តិការ តាមដែលអាចធ្វើទៅបានជាមួយ រាជរដ្ឋាភិបាលកម្ពុជា ដើម្បីលើកកម្ពស់ការយល់ដឹង អំពីបច្ចេកវិទ្យា គមនាគមន៍ និងព័ត៌មានវិទ្យា (ICT)។
ឯកឧត្តមទេសរដ្ឋមន្ត្រី ស៊ុន ចាន់ថុល បានសម្តែងនូវការគាំទ្រយ៉ាងមុតមាំ ចំពោះវិស័យបច្ចេកវិទ្យា គមនាគមន៍ និងព័ត៌មានវិទ្យានៅកម្ពុជា។
ឯកឧត្តមទេសរដ្ឋមន្ត្រី បានយល់ព្រមគាំទ្រក្រុមហ៊ុន Microsoft ក្នុងការរៀបចំសិក្ខាសាលាមួយ ស្តីពីសមត្ថភាពនិងបច្ចេកវិទ្យា Cloud សុវត្ថិភាព និងផលិតភាពក្នុងការប្រើប្រាស់បច្ចេកវិទ្យា គមនាគមន៍ និងព័ត៌មានវិទ្យា៕
ប្រភព៖ ទំព័រក្រសួងពាណិជ្ជកម្ម
ចំនួនអ្នកទស្សនា
- ថ្ងៃនេះ12721
- ម្សិលមិញ15191
- សប្តាហ៍នេះ55871
- ខែនេះ77751
- ឆ្នាំនេះ77751
- សរុប20520207